Një grua nga Kalifornia që goditi 108 herë me thikë të dashurin e saj gjatë një psikoze të shkaktuar nga kanabisi, u dënua dje me dy vjet burg me kusht.
Bryn Spejcher, 33-vjeçe duhet gjithashtu të shërbejë 100 orë shërbim në komunitet, transmeton Telegrafi.
Gjykatësi i qarkut të Venturas, David Worley tha se Spejcher nuk kishte kontroll mbi veprimet e saj kur goditi me thikë Chad O’Melia, 26-vjeç, 108 herë në banesën e tij më 28 maj 2018.
“Pas konsumimit të kanabisit, ajo pati një episod psikotik dhe nuk kishte kontroll mbi veprimet e saj”, tha Worley, siç raportohet nga New York Post.
Spejcher dhe O’Melia ishin takuar vetëm për disa javë përpara se ajo ta godiste brutalisht me thikë.
Kur policia mbërriti në vendngjarje, gjeti Spejcher të mbuluar në gjak, duke qarë pranë trupit, duke mbajtur ende thikën.
Kur policia tentoi ta merrte në paraburgim, ajo e goditi veten me thikë në fyt. O’Melia u shpall i vdekur në vendngjarje.
Sipas ligjit të Kalifornisë, një person mbahet përgjegjës për veprimet e tij edhe pse ka konsumuar drogë ose alkool, përveç nëse konsumimi nuk ka qenë i qëllimshëm.
Avokatët e Spejcher argumentuan se klientja e tyre, i cila nuk kishte pwrvoje nw tymosjen e kanabisi, nuk ishte droguar qëllimisht në kohën e vrasjes, sepse O’Melia i bëri presion asaj që të konsumonte më shumë kanabis.
Babai i Chad O’Melia, Sean, akuzoi gjykatësin për njëanshmëri dhe tha se vendimi përbën një precedent serioz.
“Ai sapo i dha leje të gjithëve në Kaliforni që pinë marihuanë një licencë për të vrarë dikë”, tha babai i pikëlluar. /Telegrafi/