Me rastin e 10 vjetorit të themelimit të Shoqatës së Grave të Policisë së Kosovës, u vu në theks rëndësia dhe të arriturat e këtyre të fundit në shërbimin e qytetarëve të Kosovës, për të krijuar siguri dhe rend.
Gjithashtu, u premtua përkrahje e vazhdueshme nga figurat vendore e ato ndërkombëtare, që gratë police të Kosovës të shtohen në numër dhe të arrijnë sa më shumë rezultate.
Ambasadori i i Shteteve të Bashkuara të Amerikës në Kosovë, Jeff Hovenier u shpreh krenar me të arriturat e grave si pjesë e Policisë së Kosovës, derisa shtoi se pavarësisht rezultateve, kjo është një fushë që duhet të vazhdojë të përmirësohet.
Ndërkaq, përfaqësuesi i OSBE-së në Kosovë, Edward Anderson i përgëzoi gratë police për punën e tyre, derisa ju drejtua se “ju i mbani të sigurt fëmijët e mi’.
Anderson shtoi se gratë e Policisë së Kosovës kanë bërë shumë, por edhe kanë për të bërë shumë, derisa u premtoi mbështetje të vazhdueshme.
Ndërsa, drejtori i Përgjithshëm i Policisë së Kosovës, Gazmend Hoxha vlerësoi lartë punën e grave police, derisa potencoi se ato janë shembull i vendeve në rajon sa i përket rezultateve të arritura.
Hoxha potencoi se mburren me punën e policeve të Kosovës, derisa përmendi edhe sfidat e vazhdueshme që kanë pasur.
Ai shtoi se tashmë janë 14 për qind gra brenda Policisë së Kosovës, derisa shtoi se nuk është numër i mjaftueshëm dhe se po punojnë për ta rritur atë. /Kp/Telegrafi/