Sulmuesi gjerman Mario Gomez do të largohet nga Besiktasi për shkak të situatës politike në Turqi.
“Ishte vendim i vështirë për të cilin kam menduar shumë. Më duhet t’u them juve fansave të Besiktasi se është shumë e rëndë për mua që nuk do të luaj më për këtë klub të madh para juve si fansa të mrekullueshëm”, ka shkruar ai në Facebook, transmeton koha.net.
Të premten në Turqi u tentua grusht shtet, duke nxitur përballje brenda shtetit e që lanë të vdekur afër 300 persona. Pas këtij tentimi u arrestuan mijëra persona.
“Arsyeja për këtë largim është krejt për shkak të situatës politike! Nuk ka asgjë sportive apo arsye tjera që më kanë shtyrë të vendosi kështu. Ishte krejt pas ngjarjeve të tmerrshme që ndodhën këto ditë. Shpresoj të më kuptoni!”, ka shkruar ai.
“Faleminderit klubit, fansave dhe të gjithë njerëzve. Kam pasur kohë të mrekullueshme. Ishte vit fantastik. Shpresoj që këto probleme të largohen sa më shpejtë që të jetë e mundur”, ka shkruar më tej futbollisti duke shtuar se shpreson që një ditë të luajë sërish aty.