Klubi nga Suhareka, Golden Eagle Ylli ka arritur të fitojë derbin rajonal ndaj Bashkimit të Prizrenit me rezultat 79:69 dhe ka kaluar në finale të Kupës së Kosovës në basketboll.
Ylli është bëri finalisti i parë në Kupën e Kosovës pasi ka arritur të fitojë ndaj Bashkimit në gjysmëfinalen e parë të zhvilluar në palestrën “Mizair Isma” në Rahovec.
Klubi therandas tregoi se e do më shumë finalen pasi fituan pa shumë vështirësi në çerekun e parë me rezultat 24:12.
Në çerekun e dytë, Bashkimi arriti të kthehet në lojë duke triumfuar me rezultat 23:14, por Ylli në pushim shkoi me epërsi prej tri pikëve 38:35.
Pjesa e dytë, nisi më mirë për “Xhebrailat”, të cilët arritën përsëri të triumfojnë me rezultat 18:11 duke quar epërsinë në 56:46 pas 30 minutave.
Çereku i katërt ishte krejtësisht i barabartë pasi përfundoi 23:23 duke pamundësuar një rikthim të Bashkimit dhe duke bërë që Ylli të prek finalen pas triumfit 79:69.
Basketbollistët më të dalluar në këtë ndeshje ishin Devonte Browen me 17 pikë e 7 kërcime te Ylli, ndërsa te Bashkimi më i dalluari ishte Stevie Clark me 19 pikë e 5 kërcime.
Ylli në finale do të takohet me fituesin e gjysmëfinales tjetër në mes të Pejës dhe Rahovecit, e cila zhvillohet sot (e enjte) më vonë. /Telegrafi/