“Dadush” titullohet projekti më i ri i dy artistëve të njohur të estradës shqiptare.
Fjala është për reperin nga Presheva, Gold AG dhe vokalistin e grupit “FAMA”, Burak Vehapin, të cilët kanë ripërpunuar një prej projekteve të vjetra, ku më parë u këndua nga Afrim Muçiqi, Bujar Qamili e shumë të tjerë.
Duket se kjo këngë e tyre është realizuar për xhirimet e fundvitit, të cilën tanimë mund ta gjeni në kanalin YouTube.
Riorkestrimin e këngës e ka bërë Ardian Kastrati, kurse për producimin është përkujdesur MProduction.
Videoja po ashtu i është besuar produksionit të lartpërmendur, gjersa është publikuar në po të njëjtin kanal muzikor.
Të njëjtit kanë bashkëpunuar edhe më herët, e që vitin e kaluar sollën projektin e përbashkët të titulluar “Urime Ditëlindjen”, përmes të cilit pasqyruan një ngjarje të vërtetë.
Të dy artistët po ashtu janë shumë të kërkuar në mbrëmje dhe ahengje të ndryshme muzikore. /Telegrafi/