Gjyqtari i ka kërkuar falje Portugalisë pas gabimit që ia mohoi golin

Gjyqtari i ndeshjes kualifikuese të Kampionatit Botëror ndërmjet Portugalisë dhe Serbisë, Danny Makkelie, ka kërkuar falje për gabimin e tij.

Ai ka thënë për gazetën A Bola se i ka kërkuar falje trajnerit Fernando Santos, si edhe pjesës tjetër të skuadrës.

“E gjitha që mund të them është se i kam thënë trajnerit dhe ekipit se më vjen keq për atë që ka ndodhur. Si ekip i gjyqtarëve, vazhdimisht angazhohemi që të marrim vendimet e duhura. Kur jemi në lajme për arsye të këtilla, nuk jemi aspak të kënaqur”, citohet të ketë thënë Makkelie.

Kujtojmë që në ndeshjen e Grupit A, Cristiano Ronaldo shënoi një gol në minutat shtesë, mirëpo gjyqtari anësor nuk e pa që topi e kaloi vijën fatale dhe goli nuk u pranua.

Lexo po ashtu I mohohet goli i rregullt në minutat shtesë ndaj Serbisë, Ronaldo ndëshkohet me të verdhë dhe lë fushën i tensionuar

Përkundër reagimit të superyllit të Juventusit, Portugalia u desh ta pranonte një pikë nga barazimi 2-2. /Telegrafi/