Policia e Kosovës ka njoftuar se ka arrestuar dy persona në Gjilan, pasi që të njëjtit dyshohen se kanë gjuajtur me armë zjarri në një aheng familjar.
Rasti ka ndodhur më 16 korrik, rreth orës 14:20, transmeton Telegrafi.
“Drejtoria rajonale e Policisë Gjilan, stacioni Policor Gjilan me datën 16.07.2023 rreth orës 14:20 ka pranuar informacion për të shtëna me armë zjarri në një lagje të qytetit të Gjilanit.
Njësitet policore kanë arritur që të lokalizojnë vendin e ngjarjes ku kanë takuar dy të dyshuar R.I. (viti i lindjes 1955, mashkull, kosovar shqiptar) dhe F.S. (viti i lindjes 1977, mashkull, kosovar shqiptar) të cilët dyshohet se gjatë një ahengu familjar (dasmë) kanë shtënë me armë zjarri”, thuhet në njoftim.
Policia bën të ditur se, nga dy të dyshuarit janë konfiskuar dy armë zjarri, njëra e llojit Walther e kalibrit 9 mm dhe tjetra e llojit Zoraki 917-T si dhe tri (3) gëzhoja të kalibrit 9 mm.
“Të dyshuarit janë arrestuar dhe shoqëruar në stacionin Policor Gjilan ku janë intervistuar në prani të avokatëve mbrojtës”, vijon njoftimi.
Në lidhje me rastin është njoftuar prokurori i shtetit i cili ka urdhëruar që ndaj dy të dyshuarve të ngritët kallëzim penal për veprat penale “Mbajtja në pronësi, kontroll ose posedim të paautorizuar të armëve’”. dhe rasti do të procedohet në prokurorinë themelore.
“Me këtë rast Drejtoria rajonale e Policisë Gjilan me që jemi në sezonin kur jemi të bashkuar për të ndarë kohë të mirë dhe gëzime familjare, u bënë apel të gjithë qytetarëve për mos përdorim të armëve gjatë këtyre evenimenteve”, vijon njoftimi.
Tutje, në njoftim thuhet se, në të shkuarën ka pasur raste kur përdorimi i armëve në këso raste ka sjellë pasoja tragjike. Ne duhet të marrim përgjegjësinë tonë për të mbajtur një mjedis të sigurt dhe paqësor për të gjithë, andaj “Festoni me zemër, jo me armë”. /Telegrafi/
