Gjilani e ka fituar derbin e zjarrtë lokal ndaj Dritës me rezultat minimal 1-0 në ndeshjen e vlefshme për jaëvn e shtatë të Ipko Superligës së Kosovës.
Nën një atmosferë të zjarrtë dhe një stadium të stërmbushur nga dy tifozëritë, Skifterat dhe Intelektualët, derbi i madh lokal ka përfunduar me fitoren e kuqebardhve.
Pjesa e parë e ndeshjes ishte thuajse e barabartë nga të dyja skuadrat, të cilat patën rastet e veta, por vetëm vendasit arritën ta tundin rrjetën.
Rastet e para të ndeshjes i pati Drita, e cila rrezikoi me Bujar Shabanin (14′), Haxhi Nezirajn (17′) dhe Xhevdet Shabanin (27′), por goditja e asnjërit nuk e gjeti cakun.
Pas këtyre rasteve, Gjilani u kthye në lojë duke rrezikuar me anë të kapitenit Ylber Kastrati (45′), por goditja e tij përfundoi pranë portës.
Në minutën e 43-të të ndeshjes erdhi goli dhe ishte Wilber Perez, i cili shënoi me kokë për 1-0 pas asistimit të saktë nga Ansi Nika dhe me këtë rezultat skuadrat shkuan në pushim.
Në pjesën e dytë, Drita provoi diçka më shumë, por nuk ishte edhe aq konkrete, ndërsa Gjilani luante qetë dhe priste gabimin e kundërshtarit për të dyfishuar epërsinë.
Drita tentoi ta barazonte rezultatin me Erjon Vucajn (55′), Xh. Shabanin (62′) dhe Përparim Livorekën (74′), por pa sukses.
Në minutat e mbetur të dyja skuadrat patën rastet e veta, por pa arritur t’i ndryshojnë shifrat dhe në ishte Gjilani që mori një fitore të madhe me rezultat 1-0.
Pas kësaj fitore, Gjilani ngjitet në vendin e katërt me 13 pikë, po aq sa Flamurtari në të tretin, ndërsa Drita mbetet në zonën e barazhit me vetëm gjashtë pikë.
Në ndeshjen e radhës, Skifterat luajnë në udhëtim te Flamurtari, ndërsa Intelektualët e presin në shtëpi Trepçën ’89. /Telegrafi/