Gjilani ka arritur ta mposht Ballkanin në javën e pestë të Superligës së Kosovës me rezultat minimal 1-0.
Të dyja skuadrat e filluan përballjen e tyre me një lojë të hapur, derisa rastet nuk kishin se si të mungonin për gol.
Visar Berisha i Ballkanit e rrezikoi portën e vendasve me një gjuajtje me kokë, mirëpo ajo u ndal nga portieri Haxhihamza.
Skuadra e Ismet Munishit kishte një rast ideal për gol në minutën e 26-të, pasi Arbër Hoxha gjuajti nga 20 metra, por portieri i Gjilanit ishte përsëri në vend.
Vendasit filluan të këndellen në fund të pjesës së parë duke e rrezikuar portën e Ballkanit me anë të Gerhard Prognit, por pa sukses.
Pjesa e parë përfundoi pa gola, ndërsa e dyta ishte e rezervuar për Gjilanin.
Me të filluar 45 minutëshi i dytë, vendasit kaluan në epërsi me anë të Prognit që shënoi në minutën e 47-të.
Gjilanasit tentuar të dyfishonin epërsinë në minutat në vazhdim, por goditjen e Fiton Hajdarit e ndali portieri Ruxhi.
Ballkani tentoi në fund të barazonte rezultatin, mirëpo mbrojtja e ngjeshur e vendasve, bëri që rezultati të mbetej 1-0.
Pas xhiros së pestë, Gjilani është bërë lider i Superligës 12 pikë , derisa Ballkani renditet në të tretin me tetë sosh, gjersa është humbja e parë për ta në këtë sezon. /Telegrafi/
