Gjilani ka dalë me komunikatë zyrtare rreth incidentit që ka ndodhur në ndeshjen e zhvilluar në xhiron e tretë të Albi Mall Superligës së Kosovës, si mysafir i Drenicës.
Lojtari i skuadrës nga Skenderaj, Shkëlzen Lushtaku është kapur nga kamerat duke bërë thirrje raciste ndaj atij të gjilanasve, Elton Cale.
Në lidhje me fyerjet raciste që bëri anëtari i Drenicës, Gjilani ka kërkuar që lojtari të ndëshkohet në bazë të rregulloreve.
Më poshtë mund ta lexoni reagimi e plotë nga klubi gjilanas (pa ndërhyrje):
? ?????????Ë ???????, ????? ????!
Sport Club Gjilani reagon publikisht për fyerjet raciste në drejtim të futbollistit Elton Cale.
Futbollisti Cale u ofendua në baza racore nga Shkëlzen Lushtaku, futbollist i Klubit “Drenica” nga Skenderaj në duelin e xhiros së tretë në kampionatin “Albi Mall Superliga”.
Klubi ka reaguar menjëherë duke lajmëruar zyrtarin e ndeshjes, ztr. Agim Hasanin, gjyqtarin e katërt Isak Ceroviku dhe gjyqtarin kryesor Alban Shala. Po ashtu, edhe pas përfundimit të ndeshjes janë lajmëruar organet gjegjëse në Federatën e Futbollit të Kosovës.
Të njoftuar tashmë janë edhe shoqata për Mbrojtjen e të Drejtave të Futbollistëve, si dhe Komisioni i Etikës pranë UEFA-së, pasi që konsiderojmë se këto fyerje dhe sjellje në drejtim të futbollistit Cale nuk duhet të kalojnë pa u ndëshkuar, e në rastin më të vogël pa reaguar.
Në këto momente jo të lehta për futbollistin Cale dhe familjen e tij, ne qëndrojmë afër tyre dhe i ofrojmë mbështetje të plotë në luftën kundër racizmit, duke i siguruar që do të jemi vazhdimisht ‘këmbanë’ e këtij fenomeni të shëmtuar.
Sport Club Gjilani u bën thirrje gjithë futbollistëve dhe komunitetit sportiv në vend të kenë më shumë tolerancë ndërmjet vete dhe lojën e futbollit ta bazojnë në suazat e fair-playt dhe jo në suaza të racizmit. /Telegrafi/
