Ministria e Jashtme gjermane të premten tha se Hungaria ka shkaktuar “shumë dëme” në 12 ditët që kur mori presidencën e radhës të BE-së.
Një zëdhënës në Berlin i quajti vizitat e kryeministrit hungarez Viktor Orbán në Moskë dhe Pekin “përpjekje solo hungareze që ne e vëzhgojmë me habi dhe skepticizëm të madh”, shkruajnë mediat e huaja, përcjell Telegrafi.
Ai tha se Orbán po vepronte në cilësinë personale dhe jo si përfaqësues i BE-së.
Ndërsa në lidhje me pasojat e mundshme për vizitat, zëdhënësi tha: “Duhet të shohim se si do të vazhdojë presidenca e Këshillit hungarez. Tani jemi në ditën e 12-të dhe tashmë ka shkaktuar shumë dëme”.
Ndërsa zëvendës-zëdhënësi i qeverisë Wolfgang Büchner tha se Orbán mund të udhëtonte ku të donte.
“Ajo që nuk është e pranueshme është se ai udhëton nëpër botë me përshtypjen se po e bën këtë në emër të të tjerëve. Dhe sigurisht që do të ketë diskutime të mëtejshme se si të merremi me këtë”, shtoi ai.
Ndryshe, përpara samitit të NATO-s në Uashington këtë javë, Orbán u takua me presidentin rus Vladimir Putin në Moskë dhe homologun e tij kinez Xi Jinping në Pekin.
Të dyja vizitat përfshinin diskutime mbi propozimet e mundshme të paqes për Ukrainën, e cila është përballur me një pushtim rus për më shumë se dy vjet. /Telegrafi/