Gjermania planifikon të ndalojë operatorët e telekomunikacionit të përdorin komponentë të caktuar të prodhuar nga kompanitë kineze Huawei dhe ZTE në rrjetet 5G, me arsyetimin rreth sigurisë kombëtare.
Sipas medieve, ky ndalim mund të përfshijë komponentë të integruar tashmë në rrjete, duke kërkuar që operatorët t’i heqin dhe zëvendësojnë ato.
Qeveria gjermane është në mes të një rivlerësimi më të gjerë të marrëdhënieve të saj me Kinën.
Megjithatë, asnjë operator nuk ishte ndaluar të përdorte disa komponentë nga kompanitë kineze në rrjetet e tyre 5G. Ndryshimi kryesor është se këto kontrolle të rrepta për rreziqet e mundshme të sigurisë tani zbatohen edhe për komponentët ekzistues në rrjetet e telekomunikacionit.
Gjithashtu bëhet e ditur se operatorët nuk do të kompensohen për pjesët që duhet të hiqen nga rrjeti dhe të zëvendësohen.
Një dokument i Ministrisë gjermane të Punëve të Brendshme mbi këtë rishikim, bën të qartë se një furnizues specifik mund të ndalohet të ofrojë komponentë kritikë nëse konsiderohet se kontrollohet drejtpërdrejt ose tërthorazi nga qeveria e një shteti tjetër.
Kritikët e Huaweit dhe ZTE-së thonë se lidhjet e tyre të ngushta me shërbimet e sigurisë së Pekinit nënkuptojnë se futja e tyre në rrjetet e kudogjendura të telefonisë mobile mund t’u japë spiunëve kinezë dhe madje edhe sabotatorëve qasje në infrastrukturën thelbësore të vendit. /Telegrafi/