Restorantet dhe hotelierët gjermane presin një numër rekord vizitorësh gjatë Kampionatit Evropian të futbollit “EURO 2024”, por në të njëjtën kohë kanë frikë nga mungesa e stafit.
“Është pothuajse e pamundur të gjesh staf në treg, do të na duhet të menaxhojmë dhe tërheqim personel nga degët e tjera përmes agjencive private ndërmjetësuese për një periudhë të caktuar kohore”, thotë Sami Nofal, menaxher i Heiner’s Parkhotel në Gelsenkirchen të Gjermanisë Perëndimore.
Brenda hotelit ka edhe një tarracë të madhe ku do të organizohet shikimi publik i ndeshjeve, të cilat do të zhvillohen nga 14 qershori deri më 14 korrik.
“Stafi i huazuar gjatë evropianit na kushton dukshëm më shumë, por nuk kemi rrugëdalje”, thotë Nofal.
Restorantet në të gjithë vendin kanë vështirësi të gjejnë staf të ri përpara evropianit në vendin e tyre, të cilët pjesërisht u larguan nga industria gjatë pandemisë së coronavirusit.
Sindikatat e punonjësve në industrinë e hotelerisë dhe mikpritjes, NGG, besojnë se punëtorët i kanë kthyer shpinën industrisë së mikpritjes dhe kryesisht nuk janë kthyer pas pandemisë për shkak të pagave tradicionalisht të ulëta për orë.
“Kjo, siç tregohet nga një sondazh midis anëtarëve tanë, është arsyeja kryesore pse stafi ia ka kthyer shpinën punëve mikpritëse”, njoftoi NGG.
Si rregull, restorantet paguajnë punonjësit e tyre rreth 13 euro në orë për kamarierët.
Shoqatat e mikpritjes arsyen e problemeve me personelin e shohin në radhë të parë në “akademizimin” e shoqërisë dhe ndryshimet demografike.
Kritikët e politikës sociale të qeverisë aktuale theksojnë se është e vështirë të merren miliona refugjatë që kanë arritur në Gjermani që nga viti 2015 për këto punë, sepse, si rregull, përfitimet sociale janë më shumë se fitimet në industrinë e mikpritjes. Përveç kësaj, si rregull, refugjatët dhe azilkërkuesit nuk flasin gjermanisht aq mirë sa për të punuar drejtpërdrejt me klientët.
Pavarësisht problemeve me stafin, hotelierët presin një bilanc pozitiv të EURO 2024 së ardhshme në Gjermani dhe efekte të ngjashme të favorshme si gjatë mbajtjes së Kupës së Botës 2006 në Gjermani.
E ndërsa hotelet deri më tani nuk kanë regjistruar një shpërthim rezervimesh në ditët kur luhen ndeshjet në qytetet ku ndodhen, platforma Airbnb ka regjistruar dyfishin e rezervimeve në krahasim me të njëjtën periudhë të vitit të kaluar, pavarësisht se pronarët e akomodimit kanë rritur në mënyrë drastike çmimet.
Kështu, për apartamentin më të thjeshtë, mesatarisht duhet të shpenzoni rreth 180 euro për natë, ndërsa dhomat kushtojnë mesatarisht rreth 90 euro. Shumica e të ftuarve të huaj vijnë nga Britania e Madhe. /Telegrafi/