Kreu i Forcave të Armatosura norvegjeze, gjenerali Eirik Kristoffersen, beson se dritarja e mundësive të Aleancës së NATO-s për t’u përgatitur për një konfrontim të mundshëm me Rusinë, është zvogëluar në dy deri në tre vjet.
Christoffersen vuri në dukje gjatë një interviste dhënë për Bloomberg, se NATO më parë i kishte dhënë Rusisë deri në dhjetë vjet për të rivendosur aftësitë e saj ushtarake, të varfëruara nga pushtimi në shkallë të plotë të Ukrainës, transmeton Telegrafi.
“Në një moment dikush tha se do të duhen 10 vjet, por unë mendoj se ne jemi kthyer në më pak se 10 vjet për shkak të bazës industriale që tani funksionon në Rusi. Do të duhet pak kohë, gjë që na jep një dritare tani për dy deri në tre vitet e ardhshme për të rindërtuar forcat tona, për të rindërtuar rezervat tona në të njëjtën kohë kur ne po mbështesim Ukrainën”, tha Kristoffersen.
Komandanti i Forcave të Armatosura norvegjeze vuri në dukje se pozicionet e Rusisë pranë kufijve të vendit të tij nuk kanë ndryshuar ndjeshëm gjatë vitit të kaluar, dhe kjo i lejon Oslos të përmbushë kërkesat për forcimin e aftësive mbrojtëse të rënë dakord brenda NATO-s.
“Kështu që ne mund t’i përmbushim ato plane dhe ato vendime me përmbajtje në vitet e ardhshme, por duhet të shpejtojmë. Duhet ta bëjmë brenda dy deri në tre vjet për t’u siguruar që jemi gati për çfarëdo që mund të ndodhë”, theksoi ai.
Një numër vendesh evropiane të NATO-s kanë ngritur shqetësime për rrezikun e agresionit rus në të ardhmen e afërt.
Për shembull, ministri gjerman i Mbrojtjes, Boris Pistorius, tha në janar se Aleanca duhet të përgatitet për një sulm rus ndaj një vendi të NATO-s brenda 5-8 viteve.
Presidenti polak Andrzej Duda është gjithashtu i shqetësuar se Rusia së shpejti mund të ketë aftësinë ushtarake për të sulmuar NATO-n, që në vitet 2026-2027. /Telegrafi/