Gjatë kontrollit në pikën kufitare në Mërdarë, Policia e Kosovës ka hasur në një armë brenda një valixheje në autobus. Policia njofton se personi i arrestuar në lidhje me rastin pas intervistimit është liruar dhe rasti është dërguar në procedurë të rregullt për hetime të mëtejme.
Policia e Kosovës ka njoftuar se të hënën e pesë dhjetorit në pikë kalimin kufitar në Merdare gjatë kontrollit, brenda një valixheje në autobus ka hasur një pistoletë.
“Referuar këtij rasti hetues kompetent të policisë kufitare janë marrë me rastin, kanë përcjellë rastin deri në Pejë (për identifikimin e pronarit të valixhes, e cila është marrë nga një person në Pejë)”, njofton Policia e Kosovës.
Tutje policia njofton se personi i dyshuar është arrestuar, intervistuar në stacion policor dhe në bashkëpunim me stacionin policor në Pejë, është iniciuar rasti si “Mbajtja në pronësi, kontroll ose posedim të paautorizuar të armëve”.
Mes tjerash thuhet se personi i arrestuar në konsultim me prokurorinë pas intervistimit është liruar dhe rasti është dërguar në procedurë të rregullt për hetime të mëtejme.