Policia e Kosovës ka hasur në një laborator për kultivimin e narkotikëve në fshatin Mramor të Prishtinës, në lidhje me të cilin rast ka ndaluar një person.
Lajmin e ka bërë të ditur Prokuroria përmes një komunikate për medie.
“Prokuroria Themelore në Prishtinë-Departamenti i Krimeve të Rënda, me aktvendim të prokurorit të shtetit ka ndaluar në kohëzgjatje prej 48 orësh personin me inicialet L.S., për shkak të dyshimit se i njëjti ka kryer veprën penale “Kultivimi i bimës së hashashit, shkurres së kokainës ose bimëve të kanabisit”, nga neni 272 Kodit Penal të Republikës së Kosovës”, thuhet në komunikatë.
Tutje thuhet se Prokuroria ka ndërmarrë veprimet e nevojshme hetimore, ashtu që me aprovim të gjykatës kompetente dhe në koordinim të plotë me Policinë e Kosovës, nga bastisja e realizuar në fshatin Mramor, në shtëpinë me qira të dyshuarit të lartcekur, është identifikuar një laborator për prodhimin e substancave narkotike, po ashtu janë gjetur dhe sekuestruar tridhjetegjashtë (36) bimë narkotike të llojit marihuanë.
“I dyshuari ndodhet nën masën e ndalimit prej 48 orësh, ndërsa prokurori i çështjes, do t’i ndërmerr veprimet e tjera procedurale ndaj tij”, thuhet në fund. /Telegrafi/