Zëdhënësja e Policisë së Kosovës për rajonin e Gjakovës, Lirie Podrimaj ka konfirmuar për Telegrafin se në orët e para të mëngjesit një femër ka ndërruar jetë.
Podrimaj tha se ka elemente të vrasjes aksidentale, por sipas saj së shpejti do të sqarohet rasti.
“Kemi marrë thirrje prej Emergjencës së Spitalit Rajonal të Gjakovës, se kjo femër është pa shenja jete. Ka edhe elemente të vrasjes aksidentale, por ende nuk mund të thuhet diçka e tillë. Në shumë shpejt do të dalim me komunikatë për media ku do ta sqarojmë rastin më detajisht”, ka shtuar Podrimaj.
Edhe Prokuroria Themelore e Gjakovës ka njoftuar se të hënën rreth orës 00:15, ka ndodhur një rast vrasje, në rrugën ”Ali Ibra” P.N në Gjakovë, e që sipas tyre, për momentin vrasja ka ndodhur në rrethana të panjohura.
Sipas këtij njoftimi, viktima e rastit është një grua e moshës rreth 50 vjeçe, R. Sh.
“Ngjarja ka ndodhur në ballkonin e shtëpisë së tashmë të ndjerës, ku viktima dyshohet që është qëlluar nga arma e zjarrit me një të shtënë në gjoks, i cili ka qenë vdekjeprurës. Dyshohet që vrasjen e ka shkaktuar bashkëshorti i saj Xh. Sh, i cili për momentin është në arrati. Viktima nga ana e fëmijëve të saj është dërguar në spitalin e qytetit të Gjakovës, ku nga ana e mjekëve është konstatuar vdekja e saj. Në momentin kur ka ndodhur rasti në ballkonin e shtëpisë, kanë qenë vetëm viktima dhe bashkëshorti i saj. Trupi i pa jetë është dërguar për autopsi”, thuhet në raportin e Prokurorisë Themelore të Gjakovës.
Ndryshe, ditë më parë një grua së bashku me të bijën janë vrarë nga burri i saj, pasi një mosmarrëveshje që kishte ardhur për motive të ulta. Shoqëria civile kishte organizuar protesta, duke kërkuar që përgjegjësi ta marrë dënimin e merituar, si dhe të ndëshkohen policët që i kishin neglizhuar paralajmërimet e viktimës për keqtrajtimet që po ua bënte bashkëshorti. /Telegrafi/