Ministrja e Punëve të Jashtme dhe Diasporës, Donika Gërvalla, ka reaguar pasi Policia e Kosovës prezantoi pamjet e kapura nga dronët e terroristëve.
Duke komentuar pamjet të cilat të dielën i publikuan ministri i Punëve të Brendshme, Xhelal Sveçla, me drejtorin e Policisë, kryediplomatja tha se këto janë dëshmi për përfshirjen e drejtpërdrejtë të Serbisë në sulmet kundër Republikës së Kosovës.
Sigurimi i pamjeve është mundësuar përmes dronëve të terroristëve të cilat i ka konfiskuar Policia e Kosovës.
”Dronët e sekuestruar nga grupi terrorist kanë dhënë dëshmi të tjera për përfshirjen e drejtpërdrejtë të Serbisë në sulmet kundër Republikës së Kosovës“, ka shkruar Gërvalla.
“Pamjet me dron zbulojnë se grupi terrorist u trajnua në Pasuljanske Livade, një nga bazat kryesore të Ushtrisë Serbe, si dhe në bazën e Kopaonikut. Është evidente se sulmet janë orkestruar me mbështetjen dhe planifikimin e plotë të shtetit serb”, ka shtuar Gërvalla.
Gërvalla ka kërkuar nga partnerët ndërkombëtarë që të mos e nënvlerësojnë më rrezikun e madh.
“Ne i bëjmë thirrje komunitetit ndërkombëtar të vendosë sanksione ndaj regjimit të Vuçiqit”.
“Serbia duhet të mbajë përgjegjësi dhe të përballet me pasoja. Vetëm sinjalet e qarta kundër regjimit të Vuçiqit do të ndalojnë përshkallëzimin e mëtejshëm”, ka shkruar tutje Gërvalla në platformën X. /Telegrafi/
The drones seized from the terrorist group have provided further evidence of the direct involvement of Serbia in the attacks against the Republic of Kosova. https://t.co/kSTwxENSUJ
— Donika Gërvalla-Schwarz (@gervallaschwarz) October 1, 2023