Analisti dhe ish-ministri, Dardan Gashi, në Zona B të Klan Kosovës ka thënë se tani ekziston një momentum ideal që të përjashtohet Lista Serbe nga skena politike dhe koalicioni qeverisës të gjejë pajtim me politikanë serbë të moderuar që e pranojnë shtetin e Kosovës.
“Tani mundësohet që njëherë e përgjithmonë të përjashtohen nga skena politike Lista Serbe”, tha Gashi, duke iu referuar bojkotit momental që Lista Serbe i ka bërë Parlamentit dhe Qeverisë së Kosovës.
“Lista duhet të zëvendësohet me një element tjetër serb nëse ata nuk kthehen, ose duhet të shpallen zgjedhjet e reja. Është një rast i mirë që Qeveria e Kosovës të akordohet me serbët e moderuar”, pasi sipas Gashit tek Lista Serbe ka një “frymë naziste dhe fashiste”.
Gashi ka folur edhe për deklaratat e drejtorit të Zyrës për Kosovën në Qeverinë e Serbisë, i cili ka thënë se e ka ndërmend ta dërgojë çështjen e Trepçës në Këshillin e Sigurimit në Kombet e Bashkuara.
“Askush në OKB përpos Rusisë nuk do të merret seriozisht me këtë kërkesë”, ka pohuar Gashi, me ç’gjë, është pajtuar edhe panelisti tjetër i Zona B, Ilir Mirena.
“1244 në terren nuk ka ndonjë fuqi dhe drejtimi në OKB për Trepçën është më shumë për konsum të brendshëm politik të serbëve”, pohoi Mirena.