Lionel Messi nuk është ylli i vetëm për të cilin Conmebol ka zgjedhur të ndëshkojë shkaku i sjelljeve të papranueshme në kuadër të Copa Americas.
Gabriel Jesus, sulmuesi brazilian i Manchester Cityt, u pezullua për dy muaj dhe u gjobit me 30 mijë dollarë për “sjellje fyese dhe dashakeqe gjatë fitores 3-1 të Brazilit në finale kundër Perusë”.
Jezusi në minutën e 70-të morri kartonin e dytë të verdhë, pas së cilës bëri me gjest se gjyqtari ka marrë ryshfet, dhe më pas, duke dalë nga fusha, shtyu dhe shembi ekranin ku gjyqtarët këshillohen me VAR-in.
Brazili dhe Jesusi mund të apelojnë pezullimin në shtatë ditët e ardhshme, por nëse mbetet në fuqi, sulmuesi do të humbasë ndeshjet miqësore të shtatorit të Brazilit, ku këta do të takohen me Kolumbinë dhe Perunë.
Pezullimi, natyrisht, nuk vlen për ekipin ku luan lojtari, kështu ky është një lajm i mirë për Manchester Cityn dhe Pepa Guardiolan, të cilët kanë vetëm një sulmues tjetër në dispozicion, Sergio Agueron.
Ndryshe, sulmuesi gjatë dy sezoneve të fundit ka humbur 13 ndeshje shkaku i lëndimeve të kaviljes së këmbës së djathtë. /Telegrafi/
