Federata e Sindikatave të Shëndetësisë së Kosovës ka njoftuar se nuk ka marrë pjesë në hartimin dhe draftimin e Ligjit të Pagave dhe se nuk është në dijeni për vlerën e koeficientit.
“Të nderuar punëtorë shëndetësorë, meqë këto ditë po qarkullojnë draftet e ndryshme dhe reagime të ndryshme për Ligjin e Pagave, Federata e Sindikatave të Shëndetësisë së Kosovës ju njofton se ne: Nuk kemi marr pjesë në hartimin e draftit të Ligjit të Pagave dhe Nuk jemi në dijeni për vlerën e koeficientit. Andaj çdo reagim nga grupet e caktuara mund të shkaktojë amulli dhe dëmtim të procesit për Ligjin e Pagave”, thuhet në njoftimin për media.
Më tej në njoftim thuhet se Federata e Sindikatave të Shëndetësisë së Kosovës i bën apel Qeverisë së Republikës së Kosovës që sa më parë të publikojë draft-Ligjin e Pagave dhe vlerën e koeficientit me qëllim të shmangies së keqkuptimeve të cilat mund ta dëmtojnë këtë proces.
“FSSHK i siguron të gjithë punëtorët shëndetësor se në asnjë moment nuk do të pranojnë asnjë draft e asnjë koeficient që mund të shkoj në dëm të punëtorëve shëndetësor. Është momenti i fundit që të reflektoni në mënyrë të sinqertë dhe transparente, përndryshe, trazirat sociale janë të pashmangshme”, thuhet në njoftim. /Telegrafi/