Qyteti Rafah përgjatë kufirit me Egjiptin, është bërë shtëpia e 1.4 milion palestinezëve, shumica prej të cilëve kanë ikur nga lufta mes Izraelit dhe Hamasit.
Siç raporton AP, ata u larguan kur filloi ofensiva tokësore e ushtrisë izraelite, e përqendruar në veri dhe pjesën qendrore të qytetit të Gazës, transmeton Telegrafi.
Ky fakt ia ka vështirësuar punën stafit të spitalit në Rafah, të cilët janë detyruar që inkubatorët për fëmijët t’i shfrytëzojnë për 3 apo 4 fëmijë duke i futur në një.
Një veprim i tillë rrit rrezikun për përhapjen e sëmundjeve ngjitëse, por mjekët e këtij spitali po thonë se nuk kanë zgjidhje tjetër.
Mjekja Amal Ismail e cila punon në këtë spital, ka thënë se janë 70 foshnje të lindura para kohe që janë futur në vetëm 20 inkubatorë që i kanë në dispozicion.
Sipas saj, kjo do të thotë se në çdo inkubator janë futur tre deri në katër foshnje, duke ua vështirësuar madje edhe lëvizjen. /Telegrafi/
