Ka përfunduar xhiro e dytë në elitën e futbollit kosovar, me disa rezultate befasuese.
Arbëria ka befasuar edhe këtë xhiro, teksa ka ndalur Prishtinën në barazim 1-1.
Ballkani fitoi derbin e javës ndaj Feronikelit në një ndeshje dramatike 3-2, teksa Gjilani ka triumfuar në udhëtim te Llapi me rezultat minimal 0-1.
Fitoren e parë këtë edicion e ka marrë edhe Drenica që ka mposhtur Besën me rikthim 2-1.
Ndeshja mes Dritës dhe Trepçës ’89 u shty për një datë tjetër, pasi kampioni i Kosovës kishte ndeshje në arenën evropiane.
Telegrafi edhe këtë javë ka zgjedhur 11 më të mirët e javës në Superligë.
Portieri:
Donat Kaçiu i Arbërisë përsëri zë vend në formacionin më të mirë pas një ndeshje të madhe ndaj Prishtinës. Kaçiu bëri disa pritje fantastike, teksa dallohet ajo ndaj Endrit Krasniqit duke e shpëtuar skuadrën e tij nga humbja.
Mbrojtja:
Kësaj radhe vjen me tre, pasi lojtarët e reparteve tjera ishin më në formë. Labinot Ibrahimi është përsëri në mesin e më të mirëve, pasi mbrojtësi veteran bëri paraqitje të madhe ndaj ish-skuadrës së tij Prishtinës në barazimin 1-1. Formë shumë të lartë tregoi edhe kapiteni i Gjilanit, Ylber Kastrati që ishte ndër më meritorët që nënkampioni mbajti portën e paprekur ndaj Llapit. Vend në 11shen më të mirë zë edhe kapiteni i Ballkanit, Arbër Potoku i cili përpos lojës së mirë në defensivë, asistoi edhe tek goli i tretë.
Mesfusha:
Mesfusha është e mbingarkuar, pasi kësaj radhe vjen me pesë sosh. Guthier Mankenda është në krahun e djathtë pas një ndeshje shumë të mirë ndaj Arbërisë ku edhe ishte asistues. Ndërkohë në krahun e majtë është vendosur Gerhard Progni që gjithashtu dha asistimin vendimtar tek goli nga Nikac në triumfin e Gjilanit 0-1.
Dior Zabërgja shënoi gol të mrekullueshëm ndaj Prishtinës dhe zë vend në formacionin më të mirë së bashku me Qemail Elshanin që realizoi në fitoren e Drenicës dhe Edvin Kuc që asistoi te Ballkani dhe ishte i pakalueshëm në mesfsuhë.
Sulmi:
Kësaj radhe reparti ofensivë vjen me dy sulmues, që të dy ishin vendimtar në suksesin e skuadrave të tyre.
Darko Nikac shënoi golin e vetëm për Gjilanin në fitoren e madhe në udhëtim 0-1 dhe është pjesë e formacionit.
Ndërkohë nuk ka lëvizur nga vendi nga xhiroja e parë edhe Mirlind Daku. Sulmuesi gjilanas realizoi përsëri het-trik për Ballkanin, ku tre golat e tij ishin vendimtar që ‘Xhebsat’ ta mposhtin Feronikelin 3-2. /Telegrafi/
