Është konfirmuar kompletimi i shitjes së Britishvolt tek Recharge Industries, duke e shpëtuar kështu gigafabrikën e firmës start-up nga falimentimi.
Në një deklaratë, administratorët EY, thanë: “Administratorët e Përbashkët nga Britishvolt Limited kanë përfunduar shitjen e shumicës së biznesit dhe aseteve te Recharge Production UK Limited për një shumë të pazbuluar”.
“Punonjësit e mbetur të Britishvolt janë transferuar në Recharge si pjesë e transaksionit. Shitja e biznesit do të ndihmojë në mbështetjen e zhvillimit të teknologjisë dhe infrastrukturës së nevojshme për tranzicionin energjetik të Mbretërisë së Bashkuar”, thuhej tutje në deklaratën e tyre, raporton Auto Express, transmeton Telegrafi.
Recharge Industries po e ndërton një fabrikë të prodhimit të baterive të veturave elektrike në Australi. Nuk është zbuluar ende asnjë detaj në lidhje me planet e saj për fabrikën e Britishvolt në veri-lindje të Anglisë.
Britishvolt ishte parë si një projekt historik për të rritur prodhimin në vend të komponentëve të veturave elektrike. Projekti u shpëtua nga administrimi në nëntor 2022 pas sigurimit të fondeve shtesë, për t’u rifutur në administrim në janar 2023.
Shoqëria e Prodhuesve dhe Tregtarëve të Motorëve ka theksuar më parë se Mbretëria e Bashkuar ka nevojë për disa gjigafabrika për të siguruar suksesin e ardhshëm të industrisë së saj të automobilave pasi benzina dhe nafta janë hequr gradualisht.
Fabrika, në Blyth, Northumberland, kishte qenë një pjesë kyçe e angazhimeve të politikave të qeverisë për “nivelimin” nën ish-kryeministrin Boris Johnson, me një kapacitet prodhues të propozuar të aftë për të prodhuar deri në 300,000 bateri të veturave elektrike në vit. /Telegrafi/