Dhjetëra mijëra mjekë në Britaninë e Madhe nisën sot një grevë pesëditore duke kërkuar rritje të pagave.
Kështu, Shërbimi Shëndetësor Britanik (NHS) po përballet me grevën më të gjatë në histori.
Mjekët e rinj, të cilët janë në fillim të karrierës së tyre, dolën në grevë në orën 07:00 dhe Shoqata Mjekësore Britanike (BMA), sindikata e mjekëve, kërkoi një rritje pagash prej 35 për qind për të rikthyer pagat në nivelet e vitit 2008, duke marrë parasysh inflacionin, raporton associatedpress.
Ndërkohë, rreth 75 mijë mjekë të rinj në Angli kanë më shumë punë për të bërë pasi listat e pritjes së pacientëve janë në nivele rekord pas pandemisë së coronavirusit.
“Sot shënon fillimin e grevës më të gjatë të mjekëve në historinë e NHS, por ky nuk është ende një rekord që do të hyjë në histori”, thanë drejtuesit e BMA, Dr Robert Lawrenson dhe Dr Vivek Trivedi.
Ata i bënë thirrje qeverisë që të heqë dorë nga “parakushti i pakuptimtë” se nuk do të negociojë ndërkohë që grevat vazhdojnë.
Pavarësisht nga një seri grevash nga punonjësit publikë në shumë sektorë, qeveria britanike po qëndron e palëkundur në pozicionin e saj se nuk do të negociojë.
Britania, si vendet e tjera, po lufton me inflacion të lartë. Rritja e çmimeve u nxit nga problemet e zinxhirit të furnizimit si rezultat i pandemisë, dhe më pas nga pushtimi i Ukrainës nga Rusia, i cili bëri që çmimet e energjisë dhe ushqimeve të rriteshin.
Megjithëse inflacioni ka rënë pak nga kulmi i tij në 8.7 për qind, ai është ende shumë mbi nivelin prej dy për qind të vendosur nga Banka e Anglisë si objektiv. /Telegrafi/