“Fast and Furious 7” ka thyer rekordin e “Fifty Shades-in of Grey”, duke u bërë filmi më i shikuar në kinemanë e Prishtinës, ABC.
Filmi ka thyer rekord të shikueshmërisë sa i përket filmave të shfaqur deri në këtë pjesë të vitit. Të hënën në mbrëmje është mbyllur 14 ditëshi i shfaqjes së këtij filmi, me nga dy termine. Dhe që në 28 shfaqjet e tij interesimi i publikut në kinemanë ABC ka qenë 100%, duke arritur kështu numrin e shikuesve në 6020, raporton KTV.
“Interesimi i publikut për ‘Furious7’ në kinemanë ABC, edhe dy javë pas premierës, vazhdon të jetë i madh. Madje ka prej atyre që rezervimet po i bëjnë edhe për 2 apo 3 ditët e ardhshme, pasi vendet po janë të gjitha të zëna”, ka thënë Miradije Vllahiu nga kinemaja ABC.
“Filmi i shtatë i serisë së filmave “Fast and Furious” ka zgjuar një interesim të jashtëzakonshëm, sidomos për faktin që në të paraqitet aktori Paul Walker në rolin e tij të fundit”.
“Furious 7” po vazhdon të kryesojë edhe arkat filmike nëpër botë. Në rolet kryesore paraqiten aktorët Vin Diesel, Dwayne Johnson dhe Paul Walker, i cili vdiq në një aksident me veturë në vitin 2013, ende pa përfunduar xhirimet e këtij projekti, transmeton Koha.net.