Drejtori i ri i Agjencisë për Zbulim, Erolld Musliu, në një deklaratë për Alsat ka thënë emërimi i tij është bërë nga presidenti Stevo Pendarovski dhe është përkrahur nga BDI.
Musliu tha se është e nevojshme që vendimi të shpallet në Gazetën Zyrtare dhe emërimi i tij të zyrtarizohet.
“Nuk mundem të jap deklaratë deri sa nuk e shoh vendimin e emërimit tim, drejtor i Agjencisë për Zbulim të jetë shpallur në Gazetën Zyrtare. Nuk ka problem, nga e hëna jam i disponueshëm”, tha Musliu.
I pyetur për deklaratën e Bujar Osmanit, ai tha se nuk e ka lexuar dhe se nuk mund të komentojë deklaratën e tij.
“BDI është parti politike, Bujar Osmani është zy.kryeministër, nuk e di se cilin funskion e ushtron në partinë e tij, nuk e di se çfarë deklarate ka dhënë, as nuk i di qëndrimet e BDI-së, mirëpo sa e di unë ata janë në qeveri së bashku me LSDM-në, që do të thotë se e kanë përkrahur kryetarin Stevo Pendarovskin, çfarë të them më shumë”, ka thënë Musliu.
Ndryshe, pasi Pendarovski njoftoi se Erolld Musliu do të jetë drejtori i Agjencisë për Zbulim, zv.kryeministri Bujar Osmani tha se nga ky vendim i presidentit janë të shqetësuar dhe kërkoi që ta rishikojë./Telegrafi/
