Turqia po dorëzon dokumentet për padinë që Republika e Afrikës së Jugut (JAR) nisi kundër Izraelit në Gjykatën e Hagës për gjenocidin ndaj civilëve palestinezë, tha sot presidenti Recep Tayyip Erdogan.
Duke folur me gazetarët në Stamboll, ai tha se Turqia do të vazhdojë të dërgojë dokumentacion, kryesisht vizual, në lidhje me sulmet e Izraelit në Gaza.
“Unë besoj se Izraeli do të dënohet. Ne besojmë në drejtësinë e Gjykatës Ndërkombëtare të Drejtësisë”, tha udhëheqësi turk, raporton reuters.
Ministri i Jashtëm izraelit, Israel Katz e përshkroi Erdoganin si presidentin e “një vendi përgjegjës në të kaluarën për gjenocidin e armenëve”, duke shtuar se ai po sulmon Izraelin me “pretendime të pabaza”.
Republika e Afrikës së Jugut, e cila paraqiti një ankesë në Gjykatën Ndërkombëtare të Drejtësisë (ICJ) në dhjetor, u kërkoi dje gjyqtarëve që të urdhërojnë Izraelin të ndalojë menjëherë ofensivën ajrore dhe tokësore kundër enklavës palestineze.
Izraeli sot i hodhi poshtë akuzat si të pabaza dhe tha se shteti afrikan po luan “avokatin e djallit” për Hamasin, grupi militant islamik palestinez kundër të cilit Izraeli po bën luftë në Gaza. /Telegrafi/