Enzo Fernandez ka kompletuar transferimin te Chelsea gjatë afatit kalimtar të janarit.
Mesfushori argjentinas u bë lojtari më i shtrenjtë në histori të Chelseat, pasi londinezët paguan 121 milionë euro për transferimin e tij nga Benfica.
Duke parë çmimin e paguar për të, ka shumë presion dhe të gjithë në Angli presin më të mirën nga Enzo.
Megjithatë mesfushori argjentinas ka thënë se nuk i intereson çmimi që është paguar për të, pasi ajo është mes dy klubeve.
“Për sa i takon kostos së kartonit tim mund të them se këto shifra nuk kanë asnjë lidhje me mua, kjo është pjesë e futbollit”.
“Detyra ime është të dal, të futem në fushë dhe të jap maksimumin”, deklaroi Enzo Fernandez.
22-vjeçari është i bindur se Chelsean e pret një e ardhme e ndritur, pasi janë në një fazë të ambientimit.
“Kur ke kaq shumë të rinj që kanë vetëm 20 ditë për t’u njohur është e vështirë të transformohesh në një ekip të strukturuar mirë”.
“Por stafi ynë teknik dhe trajneri na kanë vënë në dispozicion të gjithë mjetet e domosdoshme për këtë. Është vetëm çështje kohe”, ka deklaruar Enzo Fernandez. /Telegrafi/