Dita e së mërkurës ka qenë e mbushur me shkrime nëpër mediat shqiptare dhe ato zvicerane lidhur me arrestimin e rap-artistes nga Ferizaji, Loredana Zefi.
Mbi të rëndonin akuza të rënda për kanosje, vënie në lajthitje dhe zhvatje të parave ndaj një çifti zviceran rreth të pesëdhjetave.
E përditshmja zvicerane “20 minutes” shkruante se Loredana akuzohej për vjedhje të 700 mijë frangave zvicerane, ndërsa citohej se pjesë e kësaj akuze të ishte edhe vëllai i saj, Bekim Zefi.
Mirëpo ky i fundit, i kontaktuar nga Telegrafi, ka rrëfyer ekskluzivisht versionin e tij të ngjarjes, duke mohuar kategorikisht akuzat që rëndojnë mbi të.
Ai ka thënë se gjithçka është një gënjeshtër e madhe dhe nuk e ka kuptuar se pse ngjarja ka arritur deri këtu.
“Jo, nuk ka asgjë të vërtetë, të gjitha janë manipulime dhe budallallëqe, këto akuza ndaj meje dhe motrës sime nuk qëndrojnë”, ka thënë Bekim Zefi për Telegrafin.
Më tutje, ai ka shtuar se personi që ka bërë këtë akuzë, është person me probleme mendore.
“Gjithçka do të vërtetohet me kohë, personi që na ka akuazuar është me probleme mendore dhe nuk trajtohet si njeri serioz Nuk ka asnjë audio-incizim apo diçka që mund ta vërtetojë këtë gjë, është shfrytëzuar rasti për prishjen e imazhit ndaj motrës sime”, ka thënë ai më tej.
Ndërkohë, gazeta zvicerane kishte konvertuar emrin e vëllait të reperes nga Bekim në Berat, për ruajtjen e integritet personal. /Telegrafi/