Kryetari i Aleancës për Ardhmërinë e Kosovës, Ramush Haradinaj i ka uruar shërim të shpejtë kryetarit të Lëvizjes Vetëvendosje, Albin Kurti pas infektimit me COVID-19.
Haradinaj ka publikuar një fotografi me Kurti, ku sipër saj i ka dëshiruar shërim të shpejtë, transmeton Telegrafi.
“Z.Albin Kurti dhe të gjithë qytetarëve të prekur nga Covid-19, iu dëshiroj shërim të shpejtë”, ka shkruar Haradinaj sipër fotografisë së publikuar në Facebook.
Kreut të LVV-së, i kanë uruar shërim të shpejtë edhe kryeministri Avdullah Hoti dhe disa deputetë të Kuvendit të Kosovës. Ndërkaq, Kurti sot bëri të ditur se është në vetë-izolim pasi që është infektuar me COVID-19.
“Të nderuar anëtarë të Lëvizjes e qytetarë të Republikës. Parmbrëmë kisha disa simptoma: kokëdhembje të lehtë, pak koll dhe dhembje e skuqje të syve. Dje jam testuar për COVID-19 dhe kam rezultuar pozitiv. Në dy javët në vijim do të qëndroj në vetizolim”, kishte njoftuar Kurti.
Ndryshe, në Kosovë është rritur numri i rasteve me COVID-19, në 24-orët e fundit janë konfirmuar 197 raste të reja, kurse numri i viktimave ka arritur në 669./Telegrafi/
