Pas fillimit me punë të kombinatit metalurgjik ”Jugohrom” që konsiderohet si ndotësi më i madh i ajrit në rajonin e Pollogut, ka reagur OJQ ”Eco Guerilla”, përmes faqes zyrtare në rrjetin social ‘Facebook’, njofton Telegrafi.
Sipas ”Eco Guerilla”, abonimi për ajër të pastër në Tetovë ka përfunduar. Ata thonë se prej sot nisi përsëri tymi, helmi dhe ndotja vdekjeprurëse për tetovarët dhe tjerët. Gjatë ndërprerjes dy mujore u pa qartë se helmuesi ”Jugohrom” e ndot këtë qytet për 40% më shumë.
Më tutje, në reagimin e tyre thuhet se në përkthim, nëse nga pasojat e ndotjes me ”Jugohrom” çdo muaj vdesin 10 njerëz, pa këtë kombinat vdesin 4 më pak, me rihapjen prej sot, do të vdesin edhe këto 4 njerëz! Ky ndotës kolektiv në këto dy muaj ndërprerje nuk ka bërë asgjë për të merituar lejimin e rihapjes nga ministria dhe qeveria e me këtë meritojnë vetëm mallkimin nga ata që i helmojnë.
”Eco Guerilla” thotë se kjo Qeveri gangsterësh po subvencionon vdekjet në Tetovë. Herët ose vonë dënimin e merituar do ta marin edhe nga qytetarët edhe nga ligji. Ndërkohë dënimin do ta paguajnë edhe familjet dhe fëmijët e tyre që jetojnë dhe frymojnë në po këtë vend. Më poshtë keni tabelën e ndotjes./Telegrafi/
