Ka përfunduar konkurrimi i 19 shteteve në natën e parë gjysmëfinale të “Eurovision 2018”, i cili po mbahet në Lisbonë të Portgualisë.
Shqipëria u përfaqësua nga këngëtari Eugent Bushpepa, i cili përfundoi me sukses interpretimin e tij, me këngën “Mall”.
Por, Eugenti nuk është shqiptari i vetëm që performoi në këtë natë, pasi në skenë u ngjit edhe shqiptarja Eleni Foureira, e cila përfaqësoi Qipron.
Ajo përfundoi me sukses interpretimin e këngës “Fuego”, me të cilin përfaqëson shtetin qiprot.
Ashtu siç kishte treguar edhe në një intervistë për Telegrafin pak javë më parë, Eleni erdhi me një performancë të zjarrtë në natën e parë të “Eurovisionit”.
“Në skenë nuk do të jem vetëm. Jemi një ekip prej gjashtë personash. Një vokalist mashkull në prapaskenë (back-vokal) dhe janë katër balerina që performojnë, dhe sigurisht që mbështesin interpretimin tim. Jam shumë e entuziazmuar dhe falënderuese që Qipro më ka zgjedhur mua për ta përfaqësuar në ‘Eurovision 2018″, ka thënë Eleni Foureira për Telegrafin.
Për të votuar Elenin, e cila këtë vit përfaqëson Qipron, mund të votoni në kodin 19 në numrat përkatës të shtetit në të cilin ndodheni.
Këngëtarja shqiptare njëherit ishte e fundit për këtë natë, e cila përmbylli fazën e shteteve konkurruese. /Telegrafi/
