Sulmuesi francez, Antoine Griezmann ka thënë se nuk është i interesuar që të transferohet te Real Madridi, madje ka theksuar se as bashkëkombasi i tij Zinedine Zidane s’do të mund ta bindte që të transferohej në Santiago Bernabeu.
Griezmann në këtë sezon ka qenë në një formë të shkëlqyer duke shënuar 32 gola në 53 paraqitje për Atletico Madridin në të gjitha garat, ndërsa është në bisedime për të vazhduar kontratën me skuadrën spanjolle, transmeton Koha.net.
Për 25 vjeçarin kanë shprehur interesim skuadrat më të mëdha evropiane si Bayern Munich, Chelsea, Manchester United e Manchester City.
“Nëse Zidane më thirr dhe më kërkon që të bashkohem me Real Madridin, do t’i them se jam te Atletico. Zidane është një person i mrekullueshëm, por unë jam këtu. Madje jam edhe në bisedime për ta vazhduar kontratën, dhe shpresoj që të arrihet”, ka thënë Griezmann, raporton Goal.
Kontrata e francezit me ekipin nga Vicente Calderon skadon në qershor 2020, ndërsa ishte bashkuar me Atletico Madridin në korrik të vitit 2014.