Ukraina tani thuhet se mund të sulmojë thellë brenda territoreve të presidentit rus, Vladimir Putin, me raketat e reja amerikane me rreze të gjata veprimi.
Bëhet e ditur se raketat fillimisht ishin vendosur për të bombarduar një aeroport ushtarak rus në Krime dhe një zonë tjetër të forcave ruse.
“Ne kemi dërguar disa, dhe do të dërgojmë dhe më shumë”, tha këshilltari i sigurisë kombëtare të Shtëpisë së Bardhë, Jake Sullivan, pasi Kongresi miratoi paketën me ndihma.
Ndryshe, raportohet se përdorimi i raketave javën e kaluar nga Ukraina i dha forcave të armatosura ukrainase një shtrirje deri në 300 kilometra, shkruan yahoonews, përcjell Telegrafi.
“Ardhja e raketave ATACMS me rreze të gjata veprimi në sasi të mjaftueshme do t’u mundësojë forcave ukrainase të degradojnë logjistikën ruse”, tha Instituti për Studimin e Luftës.
Paketa me ndihma amerikane e cila përfshin 61 miliardë dollarë për Ukrainën, u pengua nga mosmarrëveshjet mes republikanëve përpara se ligji të nënshkruhej nga presidenti Joe Biden.
Biden miratoi dërgimin e ATACMS në Ukrainë në shkurt dhe një numër “i konsiderueshëm” i raketave u përfshin në paketë një muaj më vonë.
Por, informacioni rreth dorëzimit të tyre u mbajt i fshehur.
“Raketat ATACMS do të jenë shumë shkatërruese nëse përdoren siç duhet dhe unë jam i bindur se do të jenë”, tha nënkryetari i shefave të Shtabit të Përgjithshëm të SHBA-së, Christopherr Grady. /Telegrafi/