Personi i dyshuar që theri me thikë Salman Rushdie derisa ishte në skenë në pjesën veriore të New Yorkut, është arrestuar nën akuzën për tentimvrasje të shkallës së dytë ndaj shkrimtarit të njohur, si dhe për sulm të shkallës së dytë dhe lëndimit të moderatorit – ka njoftuar policia amerikane.
I dyshuari i identifikuar si Hadi Matar, 24-vjeç nga New Jersey – po mbahet në paraburgbim në Chautaukua, transmeton Telegrafi.
Rushdie, 75-vjeç, i është nënshtruar një ndërhyrje kirurgjikale – pasi që është therur të paktën një herë në qafë dhe bark gjatë sulmit të premtes, ka shtuar policia e New Yorkut.
Shkrimtari me prejardhje indiane ishte ngjitur në skenë për të folur, kur Matar iu vërsul me thikë. Në anën tjetër, agjenti i Rushdie, Andrew Villey, ka thënë të premten mbrëma se Rushdie ka pësuar dëmtime në mëlçi si dhe i janë prerë nervat në dorë dhe sy – e aktualisht gjendet në respirator.
Henry Reese, 73-vjeç që gjithashtu ishte në skenë për të moderuar debatin me Rushdie, ka pësuar lëndime të lehta në fytyrë gjatë sulmit. Megjithatë pas trajtimit në spital është lëshuar për të vazhduar rehabilitimin në shtëpi.
Rushdie kishte shkaktuar reagime të ashpra për shkak të romanit “Vargjet Satanike” të botuar në vitin 1988, që flet për jetën e profetit Muhamed, e disa myslimanë e konsiderojnë si njeri të devijuar.
Në Iran kjo libër është e ndaluar e Ayatollah Homeini kishte kërkuar kokën e tij – duke bërë thirrje publike për ekzekutimin e tij. /Telegrafi/