Të paktën 22 persona janë vrarë deri më tani pasi tërmetet e njëpasnjëshme goditën në perëndim të Afganistanit të hënën, thanë zyrtarët.
Sipas të dhënave nga USGS e SHBA-së, tërmetet me magnitudë 4.9 dhe 5.3 kanë prekur provincën veriperëndimore të Badghis, ku shkaktuan shembje shtëpish dhe ndërtesash.
Një zëdhënës i tha AFP se katër fëmijë ishin në mesin e atyre që u gjetën të vdekur në rrënoja.
Ata shtuan se më shumë se 700 shtëpi ishin dëmtuar gjithashtu.
Tërmetet mund të shkaktojnë dëme të konsiderueshme në Afganistan, ku shumë ndërtesa nuk janë aq të qëndrueshme apo të ndërtuara mirë.
USGS regjistroi dy tërmete të hënën, të cilët goditën rreth 50 km nga Qala-e-Naw, kryeqyteti i provincës.
Tërmeti i parë goditi pasdite dhe i dyti pasoi rreth dy orë më vonë. Ndikimi i tij u ndje më shumë në rrethet Kadis dhe Mugr.
BBC Pashto raportoi se shefi i qarkut Kadis, Mohammad Saleh Purdil, tha se tërmeti kishte shembur disa shtëpi dhe kishte vrarë gra dhe fëmijë.
Ai dhe zyrtarë të tjerë kanë paralajmëruar se numri i të vdekurve mund të rritet pasi ekipet e shpëtimit po kërkojnë në rrënojat në rajonin e largët.
Badghis në veri-perëndim kufizohet me Turkmenistanin. Ai konsiderohet si një nga rajonet më të pazhvilluara dhe më të varfra të Afganistanit.
Ndryshe, Afganistani i varfër ende po lufton me një barrë të madhe borxhi dhe furnizime të pamjaftueshme, të përkeqësuara pas marrjes së pushtetit në gusht nga talebanët. /Telegrafi/