Policia e Kosovës njofton se dje rreth orës 15:00, dy fëmijë nga Ferizaj, Erion Domaneku 12 vjeçar dhe Ergin Salihu 11 vjeçar, kanë gjetur një shumë të caktuar të të hollave.
Sipas njoftimit, fëmijët i kanë gjetur të hollat tek një objekt afarist përball shkollës “Jeronim De Rada” në rrugën “Dëshmorët e Kombit” në Ferizaj.
Tutje, thuhet se të njëjtit në prezencë edhe të prindërve të tyre, paratë e gjetura i kanë dorëzuar në stacionin e policisë në Ferizaj.
“Lusim, pronarin/en e vërtetë të këtyre parave, të paraqitet në stacionin e policisë në Ferizaj dhe të vërtetohet pronësia për t’ia dorëzuar ato”, thuhet në njoftimin për media.
“Me këtë rast, Policia Rajonale e Ferizajt i ka falënderuar dy fëmijët Erionin dhe Erginin, njëkohësisht ju dëshiron shëndet dhe suksese në të ardhmen, për gjestin human dhe shembullor me rastin e dorëzimit të parave në stacionin e policisë”. /Telegrafi/