Dua Lipa asnjëherë nuk ka hezituar që t’i vë femrat dhe feminizmin në qendër të artit të saj muzikor.
Videoklipet e hiteve të saja muzikore, si “New Rules” dhe “IDGAF”, karakterizohen me praninë e një grupi femrash që e mbështesin njëra-tjetrën.
Ndërkaq, në një intervistë për version britanik të revistës GQ (botimi i muajit maj), këngëtarja shqiptare ka dhënë opinionet në lidhje me seksizmin dhe fushatat e tilla, si #MeToo.
Seksizmi nënkupton paragjykimin, stereotipizimin apo diskriminimin në baza gjinore (zakonisht ndaj femrave).
“Për një artiste femër duhet një angazhim shumë më i madh, nëse nuk je ulur pranë një pianoje ose me një kitarë, e keni parasysh?”.
“Për një artist mashkull, njerëzit menjëherë supozojnë se ata e shkruajnë vet muzikën e tyre, mirëpo për femrat, mendojnë se gjithçka është e përgatitur”, ka thënë 22-vjeçarja për GQ.
Dua ka folur më tej rreth ngacmimeve seksuale duke i vendosur në kontekst të kulturës patriarkale.
“Kjo gjë është rrënjosur në kokat tona se djemtë do të jenë djem dhe se kjo është e padëmshme”, është shprehur ajo duke shtuar se personalisht nuk ka qenë viktimë e keqtrajtimeve seksuale, mirëpo ka thënë se fushatat, si ajo #MeToo, janë shumë të rëndësishme.
Fushata #MeToo (“Edhe unë”) ka nisur nga tetori i vitit 2017 si një hashtag në rrjetet sociale për të ndihmuar në parandalimin e ngacmimeve dhe keqtrajtimeve seksuale, sidomos në vendin e punës. Kjo fushatë nisi menjëherë pas skandalit hollivudian të abuzimeve seksuale nga producenti i famshëm, Harvey Weinstein.
“Për shumë femra, qofshin aktore, këngëtare, modele, apo çfarëdo qofshin tjetër, nuk e kanë të drejtën të vishen si duan dhe çfarë duan, dhe nuk merren seriozisht (për atë që thonë apo bëjnë)”, ka thënë Lipa. /Telegrafi/