Dua Lipa ka njoftuar se ka anuluar një koncert të ardhshëm për arsye sigurie.
Këngëtarja, 29 vjeçe, ishte planifikuar të performonte në Jakarta, Indonezi më 9 nëntor si pjesë e turneut të saj në Azi, “Radical Optimism”, shkruan DailyMail.
Por në një deklaratë të shpërndarë të premten, ajo konfirmoi se koncerti i saj nuk do të realizohej dhe shprehu trishtimin për këtë vendim.
Ajo shkroi: “Jam thellësisht e trishtuar t’ju njoftoj se nuk do të mund të performoj në Jakarta këtë të shtunë, më 9 nëntor”.
“Jam në vendin tuaj të mrekullueshëm dhe gati për të performuar, por më vjen keq që duhet të ndaj me ju se është vendosur që nuk është e sigurt që performanca të vazhdojë për shkak të çështjeve të sigurisë me skenën”.
“Isha me të vërtetë e emocionuar për këtë mbrëmje, dhe më dhemb shumë që nuk mund të performojmë për ju, sidomos pas kaq shumë kohe që nga performanca ime e fundit në Jakarta”.
“Rimbursimet do të bëhen nga pika juaj e blerjes. Ju dua të gjithëve dhe mezi pres të jemi sërish bashkë në të njëjtën sallë, duke kënduar dhe vallëzuar plot energji sa më parë”, shtoi Dua.
Dua njoftoi turneun e saj global për vitin 2025, i cili vjen si promovim për albumin e saj të fundit, “Radical Optimism,” në shtator.
Pas një performance elektrizuese në festivalin “Glastonbury”, ajo shiti menjëherë dy netë radhazi në Stadiumin ikonik “Wembley” të Londrës, të caktuara për qershor 2025.
Dua ka arritur një kulm të ri në karrierën e saj, me kërkesë të madhe nga fansat, dhe ylli bëri me dije në Instagram se do të ketë edhe më shumë data të reja.
Pas koncerteve në Azi, datat e vitit 2025 do të fillojnë më 20 mars në Melbourne, Australi, në Rod Laver Arena, dhe përfshijnë performanca në Sydney, Auckland, Madrid, Hamburg, Paris, Amsterdam, Londër, Dublin.
Më pas ajo do të vazhdojë në Toronto, Çikago, Nju Jork, Miami, Los Anxhelos, dhe shumë qytete të tjera, duke përfunduar në Seattle më 16 tetor në Climate Pledge Arena.
Kjo vjen pasi një burim i tha The Sun: “[Turneu i fundit i Duas] ishte praktikisht i shitur plotësisht, por ishte një turne në arena. Të kalojë në stadiume është e jashtëzakonshme, veçanërisht kur ajo është vetëm në albumin e saj të tretë”.
Më herët këtë vit, Dua foli për besimin e ri që ka fituar, duke biseduar me Zane Lowe para publikimit të “Radical Optimism”.
Ajo kujtoi: “Më në fund, jam në një pikë në karrierën time ku ndjehem vërtet e sigurt. M’u desh shumë kohë për të arritur këtu”.
“Po tregoj gjithçka. Ky është hera ime e parë që flas për gjithçka, titullin e albumit, këngët veç e veç”.
Ajo shtoi se shkrimi i këngëve është gjithashtu një formë terapie për të: “Duke shkruar këto këngë, është një formë terapie për mua.
“Është një gjë shumë e brishtë të shkruash mendimet e tua në melodi dhe pastaj t’i bësh ato të konsumohen nga njerëzit e tjerë”. /Telegrafi/