Valmir Veliu pësoi një lëndim serioz gjatë përplasjes me Diar Miftarajn, në ndeshjen ndërmjet Prishtinës dhe Llapit, të cilën e fitoi skuadra kryeqytetase.
U desh intervenimi i menjëhershëm i stafit mjekësor, si dhe hyrje së autoambulancës në fushën e stadiumit “Fadil Vokrri”, për ta dërguar lojtarin drejt emergjencës.
Veliu është vizituar nga drejtuesit e klubit të Llapit, të cilët kanë bërë të ditur se futbollisti është në gjendje të mirë shëndetësore dhe i kanë uruar shërim të shpejtë.
“Kryetari Beqir Batatina dhe anëtarët e kryesisë së bashku me trajnerin Tahir Batatina kanë vizituar futbollistin Valmir Veliu, ku pas analizave mjekësore, ai është mirë me shëndet”.
“Po ashtu, falënderojmë stafin mjekësor të klubit në krye me Dr. Afrim Shabani – Specialist të mjekësisë sportive e që ishin në krye të detyrës (ku edhe pa i ra pipit referi, mjeku i klubit dhe ndihmësi i tij hynë në fushë për intervenim) dhe të gjithë personat tjerë që ndihmuan gjatë intervenimit”.
“I dëshirojmë rikthim të shpejtë në mesin tonë! Forca Veliu”, thuhet në një njoftim të Llapit në Facebook. /Telegrafi/
