Drejtori i përgjithshëm i Administratës Tatimore të Kosovës (ATK), Sakip Imeri, edhe pse ka një kohë të shkurtër që është në pozitën e të parit të ATK-së, ka filluar ta menaxhojë mirë paranë publike.
Ai edhe pse menaxhon institucionin e dytë më të madh të mbledhjes së miliona eurove, pas Doganës së Kosovës, në përvjetorin e 16 të ATK-së, nuk e ka shpenzuar asnjë para për ta festuar këtë përvjetor që është organizuar në një hotel në Prishtinë.
Imeri, ka deklaruar për gazetën “Epoka e re”, se më 12 shkurt 2016 e kanë festuar përvjetorin e 16 të ATK-se dhe 8-vjetorin e Pavarësisë së Republikës së Kosovës.
“Ka qenë një organizim tradicional me pjesëmarrje të të gjithë zyrtarëve të ATK-së. Është një rast i mirë për shoqërim dhe njohje e ndërsjellë e zyrtarëve në një vend të përbashkët”, ka thënë ai.
Sipas tij, shpenzimet i kanë bartur vetë zyrtarët e ATK-së.
“Është zgjidhje me kosto të shpërndarë për pjesëmarrës dhe me një kursim të parasë publike. Besoj se kjo do të vazhdojë edhe në të ardhmen”, ka thënë Imeri.