Telegrafi

Djokovic bën homazhe për terroristët e vrarë në Kosovë, kërkohet përjashtimi i përhershëm i tij nga tenisi

Shkumbin Pireva

Tenisti serb, Novak Gjokovic, ka nderuar terroristët e vrarë pas sulmit në veri të vendit, ku mbeti fillimisht i vrarë një polic i Kosovës.

Një pjesëtar i policisë së Kosovës, u vra më 24 shtator kur sulmuesit e armatosur, afro 30 sosh, sulmuan njësitet policore në fshatin Banjskë në veri të Kosovës.

Në përleshjet që pasuan mes atij grupi të armatosur dhe policisë u vranë tre terroristë dhe u arrestuan tetë persona të dyshuar si të lidhur me ta.

Djokovic ka postuar një fotografi në profilin e tij në Instagram nga tempulli i Shën Savës në Beograd, ku janë ndezur qirinj për serbët e vrarë në Kosovë.

Postimi i Novak Djokovic

Bashkë me foton e postuar, tenisti serb ka përdorur edhe disa ‘emoji’ të lutjeve si nderim për terroristët e vrarë.

Megjithatë, ky nderim i bërë nga Djokovic ka bërë bujë në rrjetet sociale, me përdorues të shumtë që kërkojnë përjashtimin e përhershëm të serbit nga sporti i tenisit.

Përveç kësaj, ka shumë përdorues që kërkojnë edhe nga kompanitë sponsorizuese që të tërheqin nga Djokovic. /Telegrafi/