Anëtarët e Parlamentit Evropian në Strasburg u paralajmëruan të enjten të mos pinë ujë nga shishet e shpërndara brenda hapësirave të brendshme, pasi njerëzit u sëmurën, duke dyshuar se bëhet fjalë për “shishe të ndotura”.
“Ju kërkohet të mos pini nga asnjë shishe uji në ambientet e PE në Strasburg”, thuhej në një mesazh me tekst urgjent dërguar mijëra punonjësve dhe politikanëve, shkruajnë mediat e huaja, përcjell Telegrafi.
SMS dha një numër mjekësor të urgjencës për t’u kontaktuar “në rast ekspozimi” dhe tha se shishet u shpërndanë edhe në zyrat e presidentes Roberta Metsola.
Shërbimi për shtyp i Parlamentit Evropian theksoi se autoritetet franceze ishin informuar për këtë çështje.
“Kontrollet e duhura janë duke vazhduar”, shkruan shërbimi i shtypit. “Mesazhi paraprak është dërguar në kuadër të detyrës së kujdesit të institucionit”, shtuan ata.
Një zyrtar i BE-së ka bërë të ditur se një numër njerëzish ishin sëmurë, por që atëherë u shëruan pasi kishin pirë ujë në shishe, ndoshta nga një shishe qelqi e larë keq.
Ndërtesa e Strasburgut prej kohësh ka një problem me sigurinë e ujit të pijshëm, por normalisht nga çezmat, vë në pah Politico. /Telegrafi/