Njerëzit në Liban janë zgjuar në “dy zona rivale kohore”, mes një mosmarrëveshjeje midis autoriteteve politike dhe fetare se si duhet vepruar.
Kryeministri në detyrë Najib Mikati njoftoi se ndryshimi i orës do të fillojë në fund të Ramazanit muajin e ardhshëm, duke i lejuar myslimanët të prishin agjërimin e tyre të përditshëm më herët.
Por autoritetet e krishtera thanë se do të ndryshonin orët të dielën e fundit të marsit, siç ndodh shumë vite, shkruajnë mediat e huaja, përcjell Telegrafi.
Dhe shumë biznese e kanë ndjekur një shembull të tillë.
Mosmarrëveshja ilustron ndarje të thella në një vend ku fraksionet e krishtera dhe myslimane zhvilluan një luftë civile në fund të viteve 1970 dhe 1980, dhe ku pozicionet politike ndahen midis grupeve fetare.
Të enjten, Mikati, një mysliman sunit, njoftoi vendimin e tij për të shtyrë ndryshimin e orës deri në mesnatën e 20 prillit.
Ai nuk dha një arsye për këtë veprim, por shumë komentues e konsiderojnë atë si një mënyrë për të rritur popullaritetin e tij gjatë Ramazanit.
Muaji i shenjtë i myslimanëve filloi më 22 mars dhe përfundon më 21 prill.
Nëse ora mbetet e pandryshuar, myslimanët do të mund ta prishin agjërimin një orë më herët, rreth orës 18:00 në vend të orës 19:00, koha kur perëndon dielli.
Por Kisha e Krishterë e Libanit tha se do ta shpërfillte vendimin, duke e quajtur atë “të habitshëm”.
Disa organizata të mëdha libaneze kanë vendosur gjithashtu ta injorojnë atë. Dy kanale lajmesh, LBCI dhe MTV, e çuan orët e tyre përpara herët të dielën.
Ndërsa Middle East Airlines, transportuesi kombëtar, vendosi për “një kompromis”.
Ai tha se orët e saj dhe pajisjet e tjera do të qëndrojnë në kohën e dimrit, por orari i fluturimit do të rregullohej për të shmangur ndërprerjen e orareve ndërkombëtare. /Telegrafi/