YouTube njofton se ka fshirë kanalet në gjuhën gjermane të menaxhuara nga Russia Today (RT) që përkrahet nga Kremlini.
Lajmin e ka bërë të ditur Dinara Toktosunova, e cila drejton RT në Gjermani (RT DE), një nga dy kanalet në këtë vend.
Gjiganti amerikan i teknologjisë tregon se ka fshirë kanalet e RT DE dhe Der Fehlende Part, sepse kishin publikuar dezinformata në lidhje me COVID-19 dhe vaksinat kundër saj.
YouTube i tha Deutsche Welle se nuk lejon këtë lloj përmbajtje që “është në kundërshtim me informacionin mjekësor të autoriteteve shëndetësore lokale ose të Organizatës Botërore të Shëndetit (OBSH) në lidhje me COVID-19”.
Shtetet e Bashkuara dhe Evropa kanë akuzuar më parë Rusinë për përhapjen e informacionit të rremë në lidhje me COVID-19 dhe vaksinat.
Në muajin gusht, rrjeti social Facebook kishte mbyllur një “fabrikë” që dezinformonte pikërisht për vaksinat kundër COVID-19, që kishte bazën në Rusi.
Pjesëmarrësit që u kapën në mashtrim ishin pjesë e një fushate mashtruese të orkestruar nga firma britanike e marketingut “Fazze” që operon jashtë Rusisë.
Ndërsa, gjatë muajit korrik, Facebook kishte njoftuar se ka larguar 65 llogari dhe 243 llogari të tjera nga Instagram që ishin të lidhura me fushatën, ku gjithashtu ka ndaluar veprimtarinë e “Fazze” nga platformat e saja. /Telegrafi/