Fabrika për asgjësimin e mbetjeve organike e cila ishte paralajmëruar të ndërtohej gjatë vitit 2014 dhe 2015, si projekt i fituar nga programi IPA i Komisionit Evropian, nuk është realizuar ende.
Ndërtimi i këtij projekti kushton 8-milionë euro, 6 milionë euro janë ndarë nga Bashkimi Evropian, dhe dy milionë euro nga Qeveria e Kosovës. Këtë e kishte deklaruar kryeshefi i Agjencisë së Ushqimit dhe Veterinarisë, Valdet Gjinovci, gjatë vitit 2014.
Ndërkaq, zyrtarja e Agjencisë së Ushqimit dhe Veterinarisë, Jehona Murati ka thënë për Tribuna Channel se në kuadër të programit të IPA-së nga Komisioni Evropian është përfituar projekti i ndërtimit të Fabrikës së riciklimit dhe përpunimit të nën-produkteve shtazore të cilat janë duke paraqitur potencial të lartë për përhapje të sëmundjeve tek njerëzit dhe kafshët si dhe një ndotje të vazhdueshme të ambientit.
Ajo ka treguar se qëllimi i ndërtimit të fabrikës ndërlidhet me përmbushjen e standardeve për mbrojtjen e shëndetit publik dhe ambientit, dhe si e tillë nënkupton zbatim të standardeve të njohura ndërkombëtarisht.