I dërguari i SHBA-së për Lindjen e Mesme, Brett McGurk, është në Kajro dhe do të vizitojë rajonin për të diskutuar në mënyrë aktive lirimin e pengjeve të mbajtura nga Hamasi në Gaza dhe sigurimin e një pauze humanitare, tha Shtëpia e Bardhë.
Zëdhënësi i Shtëpisë së Bardhë, John Kirby, tha se SHBA do të mbështesë një pauzë më të gjatë humanitare në Gaza për të siguruar lirimin e pengjeve dhe dërgimin e ndihmave humanitare.
Siç raporton Reuters, ai nuk pranoi të specifikonte një kornizë kohore dhe tha se është kundër karakterizimit të diskutimeve si negociata, transmeton Telegrafi.
“Bisedimet për një marrëveshje tjetër për lirimin e pengjeve janë shumë të matura dhe serioze”, tha Kirby në një konferencë të rregullt në Shtëpinë e Bardhë, duke shtuar se bisedimet përfshijnë një diskutim se sa kohë duhet të jetë pauza për të nxjerrë pengjet.
Me 24 ushtarë të vrarë, Izraeli përjetoi ditën më të keqe në Gaza, tha sot ushtria izraelite, ndërsa forcat e saj rrethuan kryeqytetin jugor të Gazës, duke bllokuar banorët palestinezë që u përpoqën të iknin.
Katari tha se përpjekjet e ndërmjetësimit ishin në vazhdim, pas raportimeve të mediave se po diskutohej një armëpushim. Zëdhënësi i qeverisë izraelite Eylon Levy tha se qëllimet e luftës janë të pandryshuara.
Kirby tha se McGurk po merret edhe me çështje të tjera gjatë udhëtimit të tij, duke përfshirë një vlerësim të operacioneve ushtarake të Izraelit dhe përpjekjeve për të mbrojtur civilët, si dhe çështjen e normalizimit të marrëdhënieve izraelito-saudite.
Kur u pyet se si vdekja e 24 ushtarëve izraelitë ndikoi në perceptimin e Izraelit për luftën, Kirby tha se vetëm izraelitët mund t’i përgjigjen kësaj pyetjeje.
“Ishte një ditë e tmerrshme, e tmerrshme për IDF-në. Ky është një numër i madh ushtarësh brenda një dite dhe sigurisht ngushëllimet tona shkojnë për të gjitha familjet dhe shokët e tyre”, tha ai.
Kirby përsëriti se lidershipi i ardhshëm i Gazës pas luftës nuk mund të përfshijë liderët e Hamasit dhe tha se Uashingtoni nuk dëshiron që Rripi i Gazës të tkurret.
“Sido që të duket qeverisja e Gazës, pasi kjo të përfundojë, ajo duhet të përfaqësojë dëshirat e popullit palestinez”, tha ai. /Telegrafi/