Banorët e lagjes Taphone që ndodhet në qendër të qytetit të Pejës, për çdo verë kanë telashe me kundërmimin e rëndë, që vjen nga një deponi mbeturinash afër shtëpive të tyre.
Ky vend që ndodhet afër qendrës së veterinës dhe ish-tregut të gjelbër, është i mbushur me plehra të ndryshme që hedhin banorët, e deri te mbetjet e hedhura nga punëtoritë që merren me përpunimin e ushqimit.
Sipas banorëve, kjo deponi që gjendet buzë rrjedhës së Drinit të Bardhë, është pastruar një herë por sërish është mbushur me mbeturina të shumta, transmeton Telegrafi.
Madje, ky vend në rrugën ‘Fatmir Uka’ është bërë strehë e shumë minjve dhe kafshëve tjera të vogla, që e shfrytëzojnë për ushqim.
“Nuk mund t’i hapim dritaret dhe kemi harruar kur kemi dalë në oborr. Është nxehtë, por duhet të mbyllemi brenda, sepse nuk mund të durohet kjo erë”, ka thënë një banore e lagjes në kushte anonimiteti.
“Po kemi frikë se mund të na kapë ndonjë sëmundje. Po kujdesemi që fëmijët të mos hyjnë në këtë vend, sepse mund të infektohen keq”, ka shtuar qytetarja e shqetësuar.
Gjithnjë sipas banorëve, në këtë vend zbrazen traktorë të shumtë me mbeturina që më pas po bëhen të padurueshme për qytetarët. /Telegrafi/
