Legjenda e Juventusit, Alessandro Del Piero, konsideron se Liga e Kampionëve është prioritet për Zonjën e Vjetër në sezonin e ri.
Bianconerët kanë dominuar në vitet e fundit në Serie A dhe në Kupën e Italisë, duke e fituar shtatë herë rresht titullin dhe katër herë rresht kupën.
Mirëpo, ata i humbën dy finale të Ligës së Kampionëve (2015 dhe 2017), derisa për herë të fundit e kanë fituar trofeun e madh evropian në vitin 1996, kur Del Piero ishte pjesë e skuadrës.
Transferimi i Cristiano Ronaldos nga Real Madridi i ka rritur shpresat e tifozëve të Juves për ta fituar Ligën e Kampionëve.
“Është një transferim shumë i rëndësishëm. Bianconerët kanë qenë shumë të fortë edhe pa të, ndërsa tash ata do të jenë shumë më të fortë. Ai do të jetë në gjendje ta afrojë Juven në Evropë”.
“Triumfi në Ligën e Kampionëve është prioritet”, ka thënë Del Piero për Sky.
Në ndërkohë, gjatë intervistës së dhënë nga Los Angelesi, ikona e Zonjës së Vjetër është pyetur edhe për rivalin kryesor të CR7, Lionel Messi.
“Do të paguaja vetëm që të kaloja një ditë duke u stërvitur pranë tij”, ishin fjalët e Del Pieros. /Telegrafi/